2013 წელს თბილისის სამთო, სათავგადასავლო და ექსტრემალური ფილმების ფესტივალი „ნიამორი“ დაარსების 10 წლის იუბილეს აღნიშნავს. მთელი წლის მანძილზე საქართველოს სხვადასხვა კუთხეში ფესტივალის ეგიდით სხვადასხვა ღონისძიებები გაიმართება.

ფესტივალი ოფიციალურად მედია-მეკლდეურობის ტურნირით თბილისში, 31 მარტს, „კლუბ 71“-ში გაიხსნა. ტურნირში 8 მედია საშუალების 3 ათეულამდე ჟურნალისტმა მიიღო მონაწილეობა. ვაჟთა შორის საზოგადოებრივი მაუწყებლის წარმომადგენელმა ნიკა ლომიძემ გაიმარჯვა, გოგონებში  კი რადიო იმედელმა ია პერტენავამ. „რუსთავი 2“-ის წარმომადგენელი ნათია მღებრიშვილი ამ ჯერზე მესამე იყო.

6-7 აპრილს, გუდაურში მე-8-ედ ფესტივალი „ნიამორის“ ტრადიციული მედია ტურნირი გაიმართა სამთო-სათხილამურო სპორტში. წელს, ნიამორული მედია-შეჯიბრი სპორტისა და ახალგაზრდობის საქმეთა სამინისტროს, გუდაურის განვითარების ფონდის, სათხილამურო ფედერაციისა და სპორტულ ჟურნალისტთა ასოციაციის დახმარებით ჩატარდა. შეჯიბრში სხვადასვხა მედია საშუალების 40-ზე მეტი წარმომადგენელი მიიღო მონაწილეობა. გოგონათა შორის "ნიამორის" წარმომადგენელმა ქეთი ებანოიძემ გაიმარჯვა. მამაკაცთა შორის საუკეთესო "იმედის" მონტაჟის რეჟისორი გიორგი წირქვაძე იყო. გუნდურ ასპარეზობაში "იმედმა" ზედიზედ მესამედ მოიპოვა გარდამავალი თასი.

პარალელურად ფესტივალის ოფიციალურ ვებ-გვედზე www.niamori.ge  დაიწყო საფესტივალო ფილმების განაცხადების მიღება. პირველად, ფესტივალის ისტორიაში ფილმები ონლაინ აიტვირთება, რის შემდეგაც ფესტივალის საორგანიზაციო ჯგუფი შეარჩევს 10-15 საუკეთესო ფილმს, რომლებიც უკვე დიდ ეკრანზე გავა. ასევე პირველად, ფესტივალის საიუბილეო წელს არა საკონკურსო, არამედ მხოლოდ საფესტივალო ჩვენება გაიმართება, რაც იმას ნიშნავს, რომ ფესტივალს გამარჯვებული არ ეყოლება. 

ფილმების მიღება შეწყდება 2013 წლის 10 მაისს.

ამ მომენტისთვის წინასწარი განაცხადები გაკეთებული აქვთ 5 ქართველ,  რუსეთის რამდენიმე წარმომადგენელს და იტალიელებს. შეგახსენებთ, რომ 10 წლის მანძილზე, ფესტივალში მონაწილე ქვეყნების რიცხვმა 20-ს გადააჭარბა.

2013 წელს ფესტივალის ეგიდით კიდევ ბევრი საინტერესო ღონისძიება იგეგმება. თუმცა კონკრეტული პროექტების შესახებ მოგვიანებით გაცხადდება.

ფესტივალის საორგანიზაციო ჯგუფი